കടനാട് LDF ഭരണസമിതിക്കെതിരെ ബിജെപി: അനധികൃത പന്നി ഫാമിന് ഒത്താശ, തെളിവായി വിവരാവകാശ രേഖ

പാലാ: കടനാട് പഞ്ചായത്തിലെ അനധികൃത പന്നി ഫാമിന്റെ പ്രവർത്തനത്തിന് LDF ഭരണസമിതി ഒത്താശ നൽകുന്നു എന്ന ഗുരുതരമായ ആരോപണവുമായി ബിജെപി കടനാട് പഞ്ചായത്ത് ഭാരവാഹികൾ രംഗത്തെത്തി. പഞ്ചായത്തിന്റെ ലൈസൻസ് ഫാമിനില്ല എന്ന് വ്യക്തമാക്കുന്ന വിവരാവകാശ രേഖകളുമായാണ് ബിജെപി നേതാക്കളായ ജോഷി അഗസ്റ്റിനും റോജൻ ജോർജും മീഡിയ അക്കാദമിയിൽ വാർത്താ സമ്മേളനം നടത്തിയത്. LDF ഭരണസമിതിയുടെ മൗനാനുവാദത്തോടെയാണ് കടനാട് പഞ്ചായത്തിലെ വാളിക്കുളത്ത് ഈ പന്നി ഫാം പ്രവർത്തിക്കുന്നതെന്നതിന് ഇതിൽപ്പരം തെളിവ് വേണോ എന്ന് മുഖ്യമന്ത്രിക്ക് നൽകിയ വിവരാവകാശ രേഖ ഉയർത്തിക്കാട്ടി ബിജെപി നേതാക്കൾ ചോദിച്ചു. ആർ.ഡി.ഒ. വരെ സ്ഥലം സന്ദർശിച്ച് പന്നി ഫാമിനെതിരെ ഉറച്ച നിലപാട് സ്വീകരിച്ചിട്ടും നടപടിയെടുക്കാൻ തയ്യാറാകാത്ത നിലപാടില്ലാത്ത ഭരണക്കാരാണ് ഇപ്പോൾ കടനാട് പഞ്ചായത്ത് ഭരിക്കുന്നത് എന്നും ബിജെപി കുറ്റപ്പെടുത്തി.
LDF ഭരണസമിതി ഇപ്പോൾ കടനാട് പഞ്ചായത്തിനെ നിയന്ത്രിക്കുന്നത് മാഫിയകൾക്ക് വേണ്ടിയാണ്. പഞ്ചായത്തിന് ലൈസൻസ് ഇല്ലാത്ത ഈ അനധികൃത ഫാം പൂട്ടിക്കാൻ LDF ഭരണസമിതിക്ക് എന്തുകൊണ്ട് സാധിക്കുന്നില്ല എന്ന ചോദ്യവും ബിജെപി ഉയർത്തി. ഈ വിഷയത്തിൽ പ്രതികരിച്ചതിന് ബിജെപി നേതാക്കൾക്കെതിരെയും മാധ്യമങ്ങൾക്കെതിരെയും കേസ് കൊടുക്കുവാൻ ഭരണക്കാർ തീരുമാനിച്ചെങ്കിലും പകുതിവഴിയിൽ അതും ഉപേക്ഷിച്ചു. ജനങ്ങളെ വെല്ലുവിളിക്കാൻ LDF ഭരണക്കാർക്ക് അനുവദിക്കുന്ന പ്രശ്നമില്ലെന്നും ഈ ധർമ്മ സമരത്തിൽ ബിജെപി അവസാനം വരെ പോവുമെന്നും നേതാക്കൾ വ്യക്തമാക്കി. ഭരണക്കാരുടെ പണക്കൊഴുപ്പിൽ ജനങ്ങൾ വീഴരുതെന്നും, നമ്മുടെ നാടിനു വേണ്ടിയും നമ്മുടെ മക്കൾക്ക് വേണ്ടിയും ഈ തദ്ദേശ തെരെഞ്ഞെടുപ്പിൽ LDF ഭരണത്തിനെതിരെ വിധി എഴുതണമെന്നും ജോഷി അഗസ്റ്റിനും (ബിജെപി കടനാട് പഞ്ചായത്ത് കമ്മിറ്റി പ്രസിഡണ്ട്) റോജൻ ജോർജും (ന്യൂന പക്ഷ മോർച്ച സംസ്ഥാന കമ്മിറ്റി അംഗം) വാർത്താ സമ്മേളനത്തിൽ ആവശ്യപ്പെട്ടു.