ആധാർ: രേഖകളുടെ പട്ടികയിൽ മാറ്റം; പാൻ കാർഡും സ്കൂൾ സർട്ടിഫിക്കറ്റും ഒഴിവാക്കി
ന്യൂഡൽഹി: പുതിയ ആധാർ കാർഡ് എടുക്കുന്നതിനും നിലവിലുള്ളവയിലെ വിവരങ്ങൾ തിരുത്തുന്നതിനും ആവശ്യമായ രേഖകളുടെ പട്ടികയിൽ യുണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (യുഐഡിഎഐ) നിർണായക മാറ്റങ്ങൾ വരുത്തി. പാൻ കാർഡ്, സ്കൂൾ ലീവിംഗ് സർട്ടിഫിക്കറ്റ് തുടങ്ങി ഏറ്റവും കൂടുതൽ പേർ ആശ്രയിച്ചിരുന്ന പല രേഖകളും അംഗീകൃത പട്ടികയിൽ നിന്ന് നീക്കം ചെയ്തിട്ടുണ്ട്. ഭിന്നശേഷി സർട്ടിഫിക്കറ്റ്, സർക്കാർ വകുപ്പുകൾ നൽകുന്ന ഫോട്ടോ പതിച്ച തിരിച്ചറിയൽ കാർഡുകൾ, കേന്ദ്ര-സംസ്ഥാന സർക്കാരുകൾ നൽകുന്ന കുടുംബാവകാശ രേഖകൾ, പൊതുമേഖലാ ബാങ്കുകളുടെ ഫോട്ടോ പതിച്ച പാസ് ബുക്ക് എന്നിവയും ഒഴിവാക്കപ്പെട്ട രേഖകളിൽ ഉൾപ്പെടുന്നു.
അതേസമയം പാസ്പോർട്ട്, വോട്ടർ തിരിച്ചറിയൽ കാർഡ്, ഫോട്ടോ പതിച്ച റേഷൻ കാർഡ്, ഡ്രൈവിംഗ് ലൈസൻസ്, ഫോട്ടോയുള്ള എസ്.എസ്.എൽ.സി ബുക്ക് എന്നിവ ആധാർ എൻറോൾമെന്റിനും അപ്‌ഡേറ്റിനും തിരിച്ചറിയൽ രേഖകളായി തുടർന്നും ഉപയോഗിക്കാവുന്നതാണ്. 5 മുതൽ 18 വയസ്സ് വരെയുള്ള കുട്ടികളുടെ കാര്യത്തിലും രേഖകളിൽ നിയന്ത്രണമുണ്ട്. ഇവരുടെ എൻറോൾമെന്റ് നടപടികളിൽ നിന്ന് റേഷൻ കാർഡ്, ഡ്രൈവിംഗ് ലൈസൻസ്, കേന്ദ്ര സർക്കാർ ആരോഗ്യ പദ്ധതി (CGHS) കാർഡ്, മാർക്ക് ലിസ്റ്റ് എന്നിവ യുഐഡിഎഐ ഒഴിവാക്കി.
വിവരങ്ങൾ പുതുക്കുന്ന നടപടികളിലും പുതിയ നിബന്ധനകൾ പ്രാബല്യത്തിൽ വന്നിട്ടുണ്ട്. ആധാർ എടുക്കുമ്പോൾ ജനന സർട്ടിഫിക്കറ്റ് നൽകിയിട്ടുള്ളവർ, ജനനത്തീയതി ഉൾപ്പെടെയുള്ളവ തിരുത്തുന്നതിനായി അതേ രജിസ്‌ട്രേഷൻ നമ്പറുള്ള (BRN) തിരുത്തിയ ജനന സർട്ടിഫിക്കറ്റ് തന്നെ ഹാജരാക്കേണ്ടതുണ്ട്. പാസ്പോർട്ട്, മാർക്ക് ലിസ്റ്റ് തുടങ്ങിയ മറ്റു രേഖകൾ ഉപയോഗിച്ചാണ് ആധാർ എടുത്തതെങ്കിൽ, തിരുത്തലിനായി ആ രേഖയുടെ തിരുത്തിയ പതിപ്പോ അല്ലെങ്കിൽ ജനന സർട്ടിഫിക്കറ്റോ സമർപ്പിക്കാം.
പ്രത്യേക വിഭാഗങ്ങൾക്കുള്ള ഇളവുകളും പുതിയ വിജ്ഞാപനത്തിലുണ്ട്. ലിംഗമാറ്റത്തിനും പേരുമാറ്റത്തിനും ട്രാൻസ്ജെൻഡർ തിരിച്ചറിയൽ കാർഡ് ഔദ്യോഗിക രേഖയായി സ്വീകരിക്കും. കൂടാതെ, 18 വയസ്സിനു മുകളിലുള്ള ഭിന്നശേഷിക്കാർക്കും നിരാലംബർക്കും ആധാർ എടുക്കുന്നതിനും പുതുക്കുന്നതിനും ജില്ലാ സാമൂഹികക്ഷേമ ഓഫീസർ നൽകുന്ന സ്റ്റാൻഡേർഡ് സർട്ടിഫിക്കറ്റ് മതിയാകുമെന്ന് അധികൃതർ അറിയിച്ചു.
