അതിവ സുരക്ഷാ മേഖലയിൽ നിയമലംഘനം: രാഷ്ട്രപതിയുടെ സന്ദർശനത്തിനിടെ പോലീസിനെ വെട്ടിച്ച് കടന്ന മൂന്നംഗ സംഘം പാലായിൽ പിടിയിൽ
പാലാ: രാഷ്ട്രപതിയുടെ സന്ദർശനവുമായി ബന്ധപ്പെട്ട് പാലായിൽ ഏർപ്പെടുത്തിയിരുന്ന കർശന ഗതാഗത നിയന്ത്രണങ്ങൾ ലംഘിച്ച് അതിവ സുരക്ഷാ മേഖലയിലൂടെ ബൈക്കിൽ കടന്നുപോയ മൂന്ന് യുവാക്കളെ പാലാ പോലീസ് കസ്റ്റഡിയിലെടുത്തു. അതിരമ്പുഴ സ്വദേശി ജിഷ്‌ണു രതീഷ്, കിടങ്ങൂർ സ്വദേശി സതീഷ് കെ.എം, കോതനല്ലൂർ സ്വദേശി സന്തോഷ് ചെല്ലപ്പൻ എന്നിവരെയാണ് പോലീസ് പിടികൂടിയത്.
രാഷ്ട്രപതി ചടങ്ങിൽ പങ്കെടുക്കുന്നതിനിടെയാണ് സംഭവം. സുരക്ഷയുടെ ഭാഗമായി ഗതാഗത നിയന്ത്രണം ഏർപ്പെടുത്തിയിരുന്ന റോഡിലൂടെയാണ് മൂന്ന് പേർ ഒരുമിച്ച് സഞ്ചരിച്ച ബൈക്ക് അതിവേഗം പോയത്. പോലീസിൻ്റെ നിർദ്ദേശം അവഗണിച്ച് അതിസുരക്ഷാ മേഖലയിലേക്ക് ബൈക്ക് ഓടിച്ചു കയറ്റുകയായിരുന്നു.
നിയമം ലംഘിച്ച ബൈക്കിൽ മൂന്ന് പേരായിരുന്നു ഉണ്ടായിരുന്നത്. ബൈക്ക് ഓടിച്ചയാൾ ഹെൽമറ്റ് ധരിച്ചിരുന്നെങ്കിലും പിന്നിലിരുന്ന രണ്ടുപേരും ഹെൽമറ്റ് ധരിച്ചിരുന്നില്ല. പോലീസിനെ വെട്ടിച്ച് കടന്നുകളഞ്ഞ സംഘത്തെ ഉടൻ തന്നെ പാലാ പോലീസ് പിന്തുടർന്ന് പിടികൂടുകയായിരുന്നു.
രാഷ്ട്രപതിയുടെ സന്ദർശനത്തിന്റെ ഭാഗമായി നഗരത്തിൽ അതീവ സുരക്ഷാ ക്രമീകരണങ്ങളും ഗതാഗത നിയന്ത്രണങ്ങളുമാണ് ഏർപ്പെടുത്തിയിരുന്നത്. ഈ നിയന്ത്രണങ്ങൾ മറികടന്നതിനും സുരക്ഷാ വീഴ്ച വരുത്തിയതിനും യുവാക്കൾക്കെതിരെ നിയമനടപടികൾ സ്വീകരിക്കുമെന്ന് പാലാ പോലീസ് അറിയിച്ചു.
