റെക്കോർഡ് ഉയരത്തിലെത്തിയ ശേഷം സ്വർണ വിലയിൽ വൻ ഇടിവ്: ഒരു ദിവസം കൊണ്ട് പവന് കുറഞ്ഞത് 1,600 രൂപ!

കൊച്ചി: റെക്കോർഡ് വിലയിൽ കുതിച്ചുയർന്ന കേരളത്തിലെ സ്വർണവിലയിൽ ഇന്ന് വൻ ഇടിവ് രേഖപ്പെടുത്തി. രാവിലെ നേട്ടമുണ്ടാക്കിയ ശേഷം ഉച്ചയോടെയാണ് വില കുത്തനെ താഴോട്ട് വന്നത്. ഒരു പവന് 1,600 രൂപയുടെ കുറവാണ് രേഖപ്പെടുത്തിയത്.
ഇന്ന് (ഒക്ടോബർ 21, 2025) രാവിലെ വ്യാപാരം ആരംഭിച്ചപ്പോൾ സ്വർണ വില പവന് 1,520 രൂപ വർധിച്ച് 97,360 രൂപയെന്ന റെക്കോർഡ് നിലവാരത്തിൽ എത്തിയിരുന്നു. എന്നാൽ, ഉച്ചയ്ക്ക് ശേഷം അന്താരാഷ്ട്ര വിപണിയിൽ ലാഭമെടുപ്പ് ശക്തമായതോടെ വില കുറഞ്ഞു. ഇതോടെ, പവന് 1,600 രൂപ കുറഞ്ഞ് 95,760 രൂപയായി. ഒരു ഗ്രാമിന് 200 രൂപ കുറഞ്ഞ് 11,970 രൂപയാണ് നിലവിലെ വില.
വിലയിടിവിന് കാരണം ലാഭമെടുപ്പ്
അന്താരാഷ്ട്ര വിപണിയിൽ ഉണ്ടായ ലാഭമെടുപ്പാണ് കേരളത്തിൽ സ്വർണവില കുറയാൻ പ്രധാന കാരണം. ഇന്നലെ 4,263 ഡോളറായിരുന്ന ഒരു ഔൺസ് സ്വർണത്തിന്റെ വില ഇന്ന് രാവിലെ 4,376 ഡോളർ വരെ ഉയർന്നു. ഈ കുതിപ്പിനെ തുടർന്നാണ് ആഭ്യന്തര വിപണിയിൽ രാവിലെ വില വർധിച്ചത്. എന്നാൽ, ഈ റെക്കോർഡ് നിലവാരത്തിൽ നിക്ഷേപകർ ലാഭമെടുത്തുകൊണ്ട് വിറ്റഴിച്ചതോടെ വില 4,200 ഡോളറിന് താഴേക്ക് പോയി. ഇതാണ് ഉച്ചയ്ക്ക് ശേഷം കേരളത്തിലെ വിപണിയിൽ പ്രതിഫലിച്ചത്.
സുരക്ഷിത നിക്ഷേപം എന്ന നിലയിലുള്ള സ്വർണത്തിന്റെ ഡിമാൻഡ് കുറയുന്നതിനും നിലവിൽ കാരണങ്ങളുണ്ട്. യുഎസ്-ചൈന വ്യാപാര കരാറിൽ പ്രതീക്ഷ നൽകുന്ന യുഎസ് പ്രസിഡന്റ് ട്രംപിന്റെ വാക്കുകൾ സ്വർണത്തിന് അനുകൂലമായ അന്തരീക്ഷം കുറച്ചതായും റിപ്പോർട്ടുകളുണ്ട്.