കടനാട് പഞ്ചായത്ത് ഭരണം യു.ഡി.എഫിന്; ലാലി സണ്ണി പ്രസിഡന്റ്, മണിക്കുട്ടി സന്തോഷ് വൈസ് പ്രസിഡന്റ്

കടനാട്: കടനാട് ഗ്രാമപഞ്ചായത്തിൽ യു.ഡി.എഫ് നേതൃത്വത്തിലുള്ള പുതിയ ഭരണസമിതി അധികാരമേറ്റു. മുന്നണി ധാരണപ്രകാരം നടന്ന തിരഞ്ഞെടുപ്പിൽ കോൺഗ്രസിലെ ലാലി സണ്ണിയെ ആദ്യ ടേം പ്രസിഡന്റായും കേരളാ കോൺഗ്രസിലെ മണിക്കുട്ടി സന്തോഷിനെ വൈസ് പ്രസിഡന്റായും തിരഞ്ഞെടുത്തു. ഒൻപതാം വാർഡായ വാളികുളത്തെ പ്രതിനിധീകരിക്കുന്ന ലാലി സണ്ണി കോൺഗ്രസ് അംഗമാണ്. ഏഴാം വാർഡായ എലിവാലിയിൽ നിന്നുള്ള കേരളാ കോൺഗ്രസ് അംഗമാണ് പുതിയ വൈസ് പ്രസിഡന്റായ മണിക്കുട്ടി സന്തോഷ്.
പഞ്ചായത്തിൽ യു.ഡി.എഫ് മുന്നണിക്ക് വ്യക്തമായ ഭൂരിപക്ഷമാണുള്ളത്. മുന്നണിയിലെ കക്ഷിനില പ്രകാരം കോൺഗ്രസിന് നാലും കേരളാ കോൺഗ്രസിന് മൂന്നും അംഗങ്ങളുണ്ട്. ഇതിനു പുറമെ കെ.ഡി.പി (KDP) പ്രതിനിധീകരിക്കുന്ന ഒരംഗവും മുന്നണിയുടെ ഭാഗമാണ്. ഇത്തരത്തിൽ എട്ട് അംഗങ്ങളുടെ പിന്തുണയോടെയാണ് യു.ഡി.എഫ് ഭരണസമിതി പഞ്ചായത്തിൽ അധികാരമുറപ്പിച്ചത്. പഞ്ചായത്തിന്റെ സമഗ്ര വികസനത്തിനും ജനകീയ പ്രശ്നങ്ങളുടെ പരിഹാരത്തിനുമായി മുന്നണി ഒറ്റക്കെട്ടായി പ്രവർത്തിക്കുമെന്ന് സത്യപ്രതിജ്ഞയ്ക്ക് ശേഷം പുതിയ ഭാരവാഹികൾ വ്യക്തമാക്കി. വരണാധികാരിയുടെ നേതൃത്വത്തിൽ നടന്ന തിരഞ്ഞെടുപ്പ് നടപടികൾക്ക് ശേഷം യു.ഡി.എഫ് പ്രവർത്തകർ ആഹ്ലാദ പ്രകടനം നടത്തി.